 Viva Las Vegas Autor: Viva Las Vegas
Un mosaicu de poesía, chanson, ambientes cinematográficos y medios tiempos; experimentación sónica, el cóctel perfectu
de sentimientu y frialdá.
Descripción llarga: Viva las Vegas, o lo que ye lo mesmo, José Luis Aguado y Frank Rudow,
cantante y percusionista--respectivamente--de Manta Ray, esploten nesti
proyectu les posibilidaes de la experimentación sónica, el
cóctel perfectu de sentimientu y frialdá.
Durante´l so añu escasu d´esistencia anterior a la publicación
del debú llargu homónimu, foren ellaborando un estilu cenciellu y
complexu a la vez, construyendo capes instrumentales sobre una estructura
central que nun sufre grandes variaciones. Pesie a la so apariencia conceptual,
resulta una música que va más al corazón qu´a la tiesta,
con momentos d´arrebatu hipnóticu non aptos pa cardiacos.
Les canciones del álbum presenten un mosaicu de poesía, chanson,
ambientes cinematográficos y medios tiempos que cuando paez que van
arrancar, dexen al oyente énte un silenciu total. Una riestra
d´engranaxes sonoros cola principal característica de la
moderación; nada chirria, nada ta fuera de tonu, cásique nunca se
llevanta la voz. Dende les intimistes "Estaré de paso" y
"Inmune a las palabras" hasta´l "Yo" recitáu,
pasando pelos aires vengativos de "3, 14", el post-blues de
"Don´t run, don´t cry" o la afrancesada
"Despiértate, pequeño problema", el primer discu de
Viva las Vegas--con samplers, trompetes, guitarres "descriptives",
ritmos sincopaos y el ensame de teclaos y armoníes--ye un ensayu sobre
l´amor y l´escapismu. Les lletres n´inglés y en castellanu presenten
soluciones cencielles pa problemes complicaos: "Quiero descubrir un
corazón cerca / Sano y que no rompa, que no cause sufrir"
Difícil atopar un puñau tan pobláu de sensaciones, sabores
y emociones nes manes del oyente despreveníu cuando acaben los
más de 43 minutos del discu. Latentes y al empar terminales,
clásiques y al empar innovadores, les doce composiciones de Viva las
Vegas sonen a daqué distinto. Como cuando prometemos nun amorecer nunca
más, pero apruz un amor nuevu que nos paez vivu y novedosu.
Preciu: 15,03 euros (2.501 pta)
Amuesa d'audio  (0,0 Kb.)
Referencia del proveedor: nois1023
Códigu de productu: 2099
|
