Llunáticos Autor: Tejedor
Había una espectación descomanada col nuevu discu de Tejedor... y
por fin yá ve la lluz Llunáticos: un discu que de
xuro ha enamorar. Descripción llarga: Llunáticos
ye un discu pa tolos públicos; pa suañadores y pa melómanos incorrexibles,
pal universu folk, pa toos. Ye’l segundu trabayu d’estudiu (Aris Música) del grupu asturianu encabezáu polos tres hermanos Tejedor,
col xenial gaiteru José Manuel al
frente, tres cumplir toles espectatives col so emponderadísimu discu primeru Texedores
de Suaños.
José
Manuel y Javier Tejedor
vuelven garrar el timón artísticu y xunta César
Ibarretxe asoleyen una producción artística del más altu nivel, nel
que’l talentu de los hermanos Tejedor
refléxase otra vuelta en forma de canciones y pieces instrumentales de collecha
propio.
Llunáticos
nun ye namás qu’un discu de folk, ye un discu 100% Tejedor,
un reblagu p’alantre, un apueste pola autoxestión. Tejedor abanderen clas y bon xeitu, trabayu y talentu, maxa y rigor,
con 12 cantares nuevos que van clisar pola variedá estilística, pol brillante
soníu y pola abrumadora execución. Escepcionales instrumentistes, dotaos
d’una visión musical panorámica que guañó tres mamar la bayura de la
tradición asturiana, los Tejedor,
amuesen y demuestren una personalidá musical plasmante.
Gaites
asturianes y flautes tocaes por un de los meyores gaiteros asturianos de los últimos
tiempos; acordiones, flautes, caxa y percusión en manes del multiinstrumentista
Javier Tejedor; y Eva
Tejedor recreándose en tres canciones cola so voz personal y sensibilidá
característica. Si enriba axuntamos la frescura y el bon facer a les cuerdes,
una base rítimica asturiana de gran calidá, programaciones electróniques, los
soníos tribales de l’alboka y la txalaparta, zanfona, igües de cuerda y una
llarga variedá de sonoridaes y matices qu’envuelven dafechu esti discu de música
asturiana, de música del mundu, de folk “made
in Tejedor”.
Llunáticos
foi grabáu nos estudios Elkar de San Sebastián ente Marzu y Abril de 2003.
Ente les collaboraciones y músicos participantes alcontramos a Kepa Junkera, Igor Medio, Fernando Arias, Horacio A. García, Oreka Tx,
Xabier Zeberio, Alos Quartet, Ramón Prada, Ramón G. Morán, Merce Santos,
James MacKintosh, Ibón Koterón, Lisardo Lombardía, etc.
Ensin
dulda tamos delantre d’un discu nacíu embaxo l’influxu de la lluna.
Los
cantares de Llunáticos:
1. Gaites del Infiernu 4:31
2. La Casadina 4:02
3. Llunáticos 3:41
4. Muñeires d´Avilés 3:15
5. Andolina 4:28
6. Saltón De Teixois 3:11
7. Cares/Deva 3:13
8. Pasucais de Coaña 3:32
9. N´Alcordanza 3:54
10. Xoneira 4:40
11. Etna 4:01
12. Floréu de Remis 2:46
Gaites
del Infiernu
Un de los grandes y
sorprendentes cantares del discu. Javier Tejedor fexo esta pieza instrumental qu’ufre un
deenvolvimientu impactante y una producción artística maraviosa. Acordión,
gaita, caxa, guitarra, bouzouki, nickelharpa, alboka, contrabaxu, etc, adornen
esti grandiosu cantar.
La
Casadina
L’arume
popi d’esta pieza sofítase nuna fermosa melodía en parte tradicional y en
parte composición de José Manuel y
Javier Tejedor. Destaca la voz d’Eva Tejedor demostrando que lo que primero apuntaba equí cuaya
dafechu.
Llunáticos
¡Agarráivos
a la tayuela! Composición al cargu de Javier
Tejedor col aporte xenial na programación electrónica de James MacKintosh (percusionista y batería de Capercaillie,
Shooglenifty, etc), Llunáticos da títulu
al discu, apunta nueves víes d’esploración estética y invita a Oreka
Tx, arredondiando esta gran ximuestra de ritmu dance/tribal col protagonismu
de la gaita asturiana.
Muñeires
D´Avilés
José
Manuel Tejedor
demuéstranos otra vuelta porqué se diz que ye’l meyor gaiteru del país nos
últimos 50 años. Estes Muñeres, compuestes por J. Manuel son quiciabes la
pieza instrumental de nueva creación con un soníu más puralmente asturianu.
Andolina
La cenciellez d’esta canción
ye un valor añedíu y la cadencia vocal d’Eva
Tejedor un respigu en corazón. Lletra y melodía perguapes, composición de
José Manuel y Javier Tejedor.
Saltón
De Teixois
José
Manuel Tejedor
versus Kepa Junkera, y la lluna sigue
enllena. Talentu + Talentu = regocixu, xenialidá, guapura, pasión. Descomanada
pieza instrumental que vuelve facer baltir con visceralidá mesmo nes partes acústiques
como cuando la base rítimica y les cuerdes s’axunten.
Cares/Deva
Tresparencia,
placidez y guapura surden d’estes dos composiciones a ritmu de Vals criaes por
Javier y José Manuel Tejedor col soníu cada vegada más nítidu y personal
de Javier al acordión. Dedicaes a los ríos asturianos Cares/Deva, que pasen
pel conceyo de Peñamellera.
Pasucais
de Coaña
El
pasucais ye un d’ente abondos estilos musicales de les riquísimes ayalgues qu’ufre
la tradición asturiana. El Pasucais de
Coaña ye una composición de Javier
Tejedor qu’anima a baillar.
N´Alcordanza
La
gaita doliente amilana l’alma nesta cenciella composición de Javier
Tejedor, tocada col maxisteriu y la sensibilidá de J.M. Tejedor a la gaita.
Xoneira
Xuntanza
de dos canciones tradicionales, la Xota´l Val.le y Maruxina. La bayura de les
lletres tradicionales amiéstase cola igua siempre honesta, rigurosa y novedosa
de los hermanos Tejedor.
Etna
La
pieza más triste de Llunáticos ye obra de J.M. Tejedor, axeitada a costafecha pal low
whistle. Si la melodía enbeleña pola guapura, la igua orquestal de Ramón
Prada nun fai otro qu’añedir romanticismu y puxanza.
Floréu
de Remis
El
que fuere Gaitero Mayor, D. José Remis
Ovalle, crió esta pieza que val pa glorificar al gaiteru que la toca tanto
como pa mandalu derechu a los infiernos. La versión de J.M.
Tejedor fainos creer n’ángeles y paraísos. La dificultá na interpretación
ta clara. Virtuosismu al empar qu’elegancia.
Tejedor
son: José Manuel Tejedor (gaites
asturianes, flautes y xiblates), Javier
Tejedor (acordión, caxa,
flauta, bodram y percusión), y Eva Mª
Tejedor (voz y pandereta).
Preciu: 16,83 euros (2.800 pta) Amuesa d'audio (140,9 Kb.) Referencia del proveedor: tejedor_llunat Códigu de productu: 2247
|