Gramática Histórica de la Lengua Asturiana Autor: Xosé Lluis García Arias
Midíes: 14 x 21 cm
496 p. (+ 32 mapes llingüísticos). En castellán, con dellos
testos n´asturianu. Ed. 1ª (2003). Encuadernación rústico.
Nº 15 de la colección ´Llibreria llingüística´
(ALLA). Descripción llarga: La presente Gramática Histórica de la Lengua Asturiana
reproduz, n´esencia, la primer estaya del testu de la Contribución a
la Gramática Histórica de la Lengua Asturiana y a la
Caracterización Etimológica de su Léxico, asoleyada en
1988 pola Universidá d´Uviéu y estrincada yá nes
llibreríes. Nesta segunda versión, el profesor de la
Universidá de Uviéu y ex presidente de l´Academia de la Llingua
Asturiana, Xosé Lluis García Arias, allarga enforma la
primera, na exemplificación y conteníos, y faciendo un bon
exerciciu p´afitar l´étimu na fonte documental emplegada. Entama con una
curtia descripción de la fala pa fixase llueu nos aspeutos evolutivos,
fónicos y fonolóxicos, de más calter. Recuéyense
tamién los dos capítulos de morfosintaxis hestórica, el
del casu y el del artículu, yá amestaos na primera
edición. Enanchamos esta faza cola semeya d´un artículu d´hai
unos años onde se caracteriza la llingua medieval escrita. Cuenta
asina´l llector con una ferramienta amañosa pa facese una idea
más xeneral de la hestoria de la llingua. Como colofón al llibru
qu´agora s´asoleya otra vuelta, inxerse una amestadura, lóxicamente
tamién de tipu hestóricu, cola qu´emprimaba en 1994 la primera
edición de l´Academia de la Llingua Asturiana del Fueru Xulgu, un
de los más importantes testos medievales asturianos.
Dau´l bayurosu material manexáu pol autor, del vieyu llibru de 1988
allúmase namás nesta edición la primera faza, la
empobinada dafechu a la gramática hestórica; la segunda, nel so
día, inxertará l´estudiu etimolóxicu del léxicu,
que s´aguarda con impaciencia --xunta´l tamién anunciáu
Diccionariu etimolóxicu de la llingua asturiana--, pola
insuperada consideranza de la que goza profesor García Arias como
etimólogu, non sólo dientro d´Asturies sinon tamién a
nivel internacional, como demuestra, ente otros munchos reconocimientos, el
fechu de ser el filólogu d´ámbitu hispánicu escoyíu
p´abordar la reedición d´una nueva versión del Diccionariu
etimolóxicu románicu de Meyer-Lübke.
La presente edición de la Gramática Histórica de la
Lengua Asturiana permeyora la primera gracies al llabor
inimaxinablemente llargu de Pilar Fidalgo Pravia, nos aspeutos
téunicos, índices y cartografía (el presente volume
remátase con 32 mapes llingüísticos). Tamién ye
deldora de Xosé Miguel Suárez, bon conocedor del
gallego-asturianu, y d´Héctor Xil, de les fales del occidente de
Lleón.
Preciu: 18,00 euros (2.995 pta) Referencia del proveedor: ISBN-84-8168-341-8 Códigu de productu: 2374
|