De Ñublu y Orpín Autor: Chus Pedro
La melguera voz de Chus Pedro más protagonista que nunca, en so
primer discu solu, anque acompañáu de los meyores músicos
y técnicos d´Asturies y d´acullá. Descripción llarga: El cantante del duu Nuberu Chus Pedro vuelve ser noticia na
música asturiana cola edición de De Ñublu y
Orpín, el so primer discu ensín el so --hasta agora--
inseparable compañeru Manolo Peñayos. Dende que Chus Pedro
collaboró nel discu de Tejedor Texedores de suaños,
entamó a faláse de facer un discu onde la voz fuere lo primero y
ésta tuviera acompañada por músicos y productores de
renome. Tuvieron de pasar más de cuatro años pa qu´esa idea
inicial se viere por fin materializada, principalmente a cuenta d´un procesu
mui llargu d´ellaboración.
Chus Pedro y l´arreglista del discu Gabino Antuña
esbillaron en más de 700 cantares de la tradición asturiana
p´atopar los más afechiscos y los que más-yos petaren pa grabar.
Dempués, el procesu de buscar los meyores collaboradores y profesionales
pa participar nel discu. Descartáu por razones técniques
l´inicialmente pensáu pa la producción, Phil Cunningan, el
discu cunta cola impecable collaboración del componente de
Capercaillie Donald Shaw, y Paul Mcgeechan, pa la
producción y les mezcles.
Ensín embargu, como nun podía ser otramiente, la
aportación más importante pal resultáu final del discu
débese al trabayu de los músicos asturianos. Gabino
Antuña ye´l principal productor del discu xunto con Donald
Shaw, productores que cunten col trabayu de nomes tan ruxíos como
Diego Pangua, Jose Ángel Hevia, Elias García, Xel Pereda,
Fernando Arias, Jose Manuel Tejedor o Javi Méndez. Como
esplica perbien el mesmu Chus Pedro, los cantares tán trataos con un
"estilu atlánticu", onde lo acústicu ye lo que manda, y
les trabayaes igües acaben por sofitar la escelente voz de Chus Pedro.
Esto faise notar especialmente nes escelentes versiones de les populares pieces
"Soi de Verdiciu", "Ecos de la Quintana" o "Yo fui al
Carmín de La Pola".
Cantares en discu:
1. ¿Ónde vas? 3´17"
2. Verdiciu. 3´24"
3. L´amor ye cosa triste. 4´23"
4. El que nun tien rapaza. 3´17"
5. Nel campu ñacen flores. 3´24"
6. Texeora de bayu. 4´16"
7. Yo fui al Carmín de La Pola. 2´48"
8. Así ye la vida. 4´21"
9. Agora sal a baillar. 3´36"
10. Gaiteru. 3´52"
11. Que m´escurez. 2´45"
12. Vaqueires. 4´07"
13. Vaqueires II. 2´26"
14. L´amante xana. 4´42"
Preciu: 15,03 euros (2.501 pta) Amuesa d'audio (155,0 Kb.) Referencia del proveedor: FA.CD.87131 Códigu de productu: 2375
|