 Iguador Autor: Academia de la Llingua Asturiana
Correutor ortográficu pa testos informáticos n´asturianu, con
una base de datos de cerca de 4.000.000 de pallabres.
Descripción llarga: L´Academia de la Llingua Asturiana ufierta esti Iguador
Ortográficu pa la llingua asturiana col enfotu de dir apurriendo
a los usuarios presees afayadices acordies coles nueves teunoloxíes.
L´iguador ye un correutor ortográficu que se pue integrar nos
procesadores de testu de Microsoft® Word 97®, 2000® y XP® con
una base de datos de cerca de 4.000.000 de pallabres, basada nel Diccionariu
de la Llingua Asturiana (DALLA) asoleyáu pola Academia nel
añu 2000, y qu´inxer tamién otra base de datos con casi 300
regles sintáutiques y ortográfiques. De funcionamientu cenciellu,
y teniendo como finxu principal el control d´enquívocos léxicos y
ortográficos, acompáñase d´un "Diccionariu
d´usuariu" que permite dir enanchando la base de datos de pallabres
mentada enriba a tenor de les necesidaes precises de cada testu
procesáu. Amestóse tamién una opción de
"Suxerencies" pa facilitar, en bien de casos, la iguadura más
afayadiza.
L´Iguador pue instalase nos sistemes operativos: Microsoft® Windows98®,
Microsoft® Windows2000® y Microsoft® WindowsXP®; y nes
versiones del procesador de testos Microsoft® Word® que vienen
darréu: Word97®, Word2000® y WordXP®.
Ye enfotu de l´Academia qu´esta primer edición del Iguador
Ortográficu vaya enanchándose nun futuru con nueves
ediciones, según vayan aconseyando les circunstancies y les necesidaes
normativizadores y acordies colo que se disponga pal Diccionariu de la
Llingua Asturiana. Nesti sen, encamiéntase a toes aquelles persones
interesaes que pongan en conocencia de l´Academia de la Llingua
Asturiana les observaciones que-yos paezan afayadices.
Preciu: 6,00 euros (998 pta)
Referencia del proveedor: iguador
Códigu de productu: 2378
|
