 Les races autóctones del Principáu d´Asturies Autor: Antón Álvarez Sevilla
Midíes: 24 x 17 cm.
160 p. Edición billingüe asturianu-castellanu. Abondes semeyes
en color y b/n, mapes y fiches técniques. Encuadernación
rústico, papel satinao. 1er edición (12/2001), asoleyada pola
Fundación Belenos.
Descripción llarga: Les races autóctones de ganáu constitúin un
padremuñu de gran valir qu´heredamos delos nuesos antepasaos y que tamos
obligaos a caltener y tresmitir a los nuesos descendientes.
Entamu del autor:
El fenómenu internacional de conservación nel que mos alcontramos
anguaño, remanez de los abusos de les teúniques productivistes
afitaes a pergrande escala, con unos oxetivos simplayos en términos
monetarios y a un plazu percurtiu.
Ello foi qu´entamanon a movilizase los ciudadanos non avenceyaos colos manexos
de les supuestes "meyores" ya qu´en xeneral valoraben con criterios
culturales ya ecolóxicos les carauterístiques de les castres
autóctones. Asina, al empiezu del sieglu caberu, surdíu en Gran
Bretaña l´asociación privada Rare Breed Survival Trust (ye
dicir, l´Asociación pa la Supervivencia de les Races Rares), que foi tou
un exemplu pa otres munches qu´aprucienon darréu. En 1946 ye la FAO la
qu´emprima a trabayar na xera de caltener los recursos xenéticos
animales ya vexetales del planeta.
Lo que se pretende con esti llibru ye amosar les carauterístiques
xenerales ya particulares de les races de nueso: el poni asturcón, la
vaca roxa, la oveya xalda, la cabra bermeya, la pita pinta ya´l gochu´l
país, ensin escaecer al perru mastín, son les races
autóctones del Principáu d´Asturies. Estes castres, pedreses y
albares, supunxenon la base de la vida asturiana a lo llargo los sieglos ya
fonon encontos perimportantes de la economía familiar ya xeneral del
nuesu país, como aperuyu de l´alimentación (carne, lleche, etc)
ya sofitu nel vistíu (llana, pelleya); fechos estos qu´aidanon nel
esporpolle del Principáu d´Asturies. De xuru, fonon ya son, na
realidá, ciernu del sere d´Asturies, tando encadarmaes dientro del
raigañu hestóricu-social d´Asturies, como componentes de la so
vida ya bayura, andechando al empar al equilibriu ecolóxicu.
Arriendes de polos aspeutos hestóricu, etnográficu ya
ecolóxicu, ensin dubia de gran valir "per se", estes castres
entá costitúin una abondosa fonte de bayura nos conceyos rurales
del país. Asina, son les nueses castres les que valoricen los recursos
naturales ya económicos. La importancia de caltener estes castres hai
que la contemplar, como bien dixo abenayá Isidro Sierra Alfranca,
non sólo dende una perspeutiva hestórica ya representativa de
cada País, sinón tamién dende una güeyada
téunico-centífica, como reserva de xenes que nun hai que
tresmanar.
Pa cabu, tien de faese reconocencia de los vieyos ganaderos que supienon
criales col so ciñu, ya de les nueves xeneraciones que puxen tolos
díes pa que les nueses races viñen, sintiéndose
brétigos d´elles.
Preciu: 15,00 euros (2.496 pta)
Referencia del proveedor: ISBN-84-607-3692-X
Códigu de productu: 2391
|
